《退伍軍人症》
最近一位好朋友失戀了，連日嚟折騰令佢精神萎靡，連飯都食唔落。不過都唔知說唔說得上失戀，因為曾經存在嘅戀愛只屬單方面嘅事，又名「當兵」。
然而被拒絕嘅兵比失戀嘅人可憐，因為失戀嘅人有權利傷心，但兵冇。彷彿全世界對失戀嘅人都會顯得份外寬容，對兵卻絲毫不體諒。一般人大概認為做兵嘅人本係癡心妄想，癩蛤蟆想吃天鵝肉，被對方拒絕根本抵撚死。市面上甚至冇單字去陳述呢個狀態。失戀？但從來冇戀過喎。追唔到？都冇明目張膽追過。事敗？又講到好似因姦不逐做壞事咁。
如果兵有分等級，我呢位朋友絕對係軍曹級嘅人馬：情人節會送花，其他日子會送禮，偶爾還會送埋生果上門取悅「未來岳父岳母」。女神失意時就算爆肝都會陪對方傾電話傾通宵，女神得意時會自動醒水做個沉默的觀眾。軍曹同天下間所有兵同樣有個心願，就係希望只要自己肯付出，對方終有一日會被自己嘅誠意打動。可惜世上大部份嘅成就都能透過努力達到，愛情卻係例外。試圖用努力去令人愛上自己，就有如對住一盆冇落種子嘅泥不斷澆水，以為只要夠堅持就會萌芽。可惜萌芽與否關鍵還是種子啊，兩個互有感覺嘅人行埋一齊，剛好下場大雨就事成了。
喺軍曹終於約到女神去高級餐廳約會嘅前一晚，天剛好下咗場大雨，喺電話另一頭女神用甜美嘅聲線親口同佢講咗句：「我最近識咗個男仔啊，佢同我好夾……我哋會繼續做好朋友㗎可？」「哈哈，當然啊。不如聽日張枱留返你哋去啦。」軍曹壓低聲線故作鎮定，決定將二人嘅關係作為最後賭注。豈料女神講咗句多謝後就馬上收線。軍曹拎住電話發呆，佢抓破頭皮都想唔通對方到底贏在啲咩，想著想著徹夜難眠。最後佢搵咗套女主角同佢女神有幾分似樣嘅AV，喊住連打咗幾次飛機，打到攰心情才能夠平伏。
成世人流流長，男或女都有可能會做兵。不論成功與否，兵嘅付出絕對不比其他戀愛關係虛假。當兵嘅人大多係社會嘅中流砥柱，因為佢哋奉信一分耕耘，一分收獲。假如世上冇咗呢班肯付出肯捱嘅人材，就業率會下降，經濟會步向衰退，社會會慢慢崩壞。就算兵得不到男神女神嘅青睞，至少都值得我哋更多嘅尊重同關懷。
* 最近好懶更新FB𠻹，但IG會日日更新，IG : sis3ter
Search